Wishful Thinking

Thursday, April 06, 2006

Triveni - 3

(As you can guess, Triveni bug has bitten me hard and here is the third set in the series. This time, I have tried more of romantic-fantastical themes, so not much of an experimentation, as far as the construction goes; emphasis is more on the feel.)

Pal

Ghaayal huye zamana hua,
par yaadon ka namak barasta hai.
Dekh yeh pal, ab bhi tadapta hai...

Bar-qaraar

Jab tu gussey mein jaati hai, palat-ti bhi nahin,
aur khaati hai thokar, main samajh jaata hoon.
Mohabbat bar-qaraar hai.

Aawaaz

Aawaazon ki bheed aur khayaalon ki hulchul se parey,
Koi sunsaan mazhab chalaaya jaaye.
Teri aankhon ko namaaz, mujhe namaazi banaya jaaye.

Chaand

Chaand shab bhar kyun akadta hai,
Daayam toh hai tu, daayar nahin.
Hoga haseen tu, par main koi shaayar nahin.

(Daayam: permanent, Daayar: Limit)

Ada

Dhoop mein, iss-se chhanti hain kiranein,
Barsaat mein halki boondein aati hain.
Mere toote chhaatey mein, teri ada hai Dilbar.

Posted by Varun :: 12:50 PM :: 9 comments

Saturday, April 01, 2006

Triveni - 2

(Continuing with my previous post of Trivenis, here are a few more experiments.)

Aaraam

Ek lamha aata hai, ek lamha jaata,
Ek yaad aati hai, ek yaad jaati.
Waqt yeh muaah, aaraam kyun nahin karta!

Duaa

Lakeerein sab mitt si gayi hain,
Jaan bhi baaki nahin inn ungliyon mein.
Bas duaa hi karta hoon, inn haathon se ab.

Aa ja

Riste hain ehsaas, phoot rahi yaadein,
Kahin beh na jaayein, saath bitaaye saare lamhe.
Aa ja kahin se, apni saanson ka paiband laga de..!

Khat

Kai baar aisa hua hai, khat likhte-likhte,
Kalam dhadakne lagti hai, kaagaz jaag jaata hai,
Naam Mohabbat, Pata Zindagi.

Yahi kah kar...

Deewaron se baahar niklo, duniya dekho,
Ujaale tubelight ki roshni se zyada milenge.
Yahi kah kar chal diye, har aashiyaane se...

Posted by Varun :: 1:00 PM :: 4 comments